Ahmad Ajmi

دول، 25 مدينة وجزيرة، 13 رحلة طيران، 37.000KM

تجربتي لزيارة تايلاند، فيتنام، هونج كونج، اندونيسيا، ماليزيا

تخطيط مبدئي للرحلة قبل السفر

من فترة وأنا حابب أعمل جولة في كل قارة من القارات، مجموعة دول في كل زيارة لمدة معينة، فكرت أروح أوروبا لمدة شهر مثلا، لكن موضوع الشنجن والباسبور عندي جديد وكوني مش بشتغل في شركة علشان الـ HR خلاني أفكر في مكان تاني أسهل في السفر وفي نفس الوقت أعمل تاريخ سفر كويس على الباسبور ممكن يفيدني بعد كدا في إني أزور دول أكثر صعوبة في الفيزا، أوروبا، أمريكا، ... ففكرت أسافر 3 شهور في جنوب شرق آسيا، بدأت أشوف إيه الدول الموجودة في المنطقة وسهولة الفيزا وصعوبتها ولو في تصريح أمني مثلا وقد إيه ممكن كل دولة تحتاج من الوقت بشكل مبدئي وهل ممكن أزور كل الدول اللي موجودة في جنوب شرق آسيا ولا ممكن اقتصر على دول معينة. المهم، قررت ازور تايلاند وفيتنام وإندونيسيا وماليزيا وضفت معاهم هونج كونج بما انها مش محتاجة فيزا ومش بعيدة. كنت بفكر اروح الفلبين وكمبوديا ولاوس وميانمار، بس الفلبين كانت محتاجة فيزا ومكنش فيه وقت وباقي الدول ممكن أزورها مرة ثانية وكمان حسيت أني لو زرت كل الدول في ال 3 شهور هيكون كدا بستعجل نفسي في كل دولة ومش هلحق أقضي وقت كويس في كل بلد. قررت أقضي ٣ أسابيع في كل من تايلاند وفيتنام وإندونيسيا وماليزيا و٣ ايام في هونج كونج، وعلى هذا الأساس حجزت الطيران من وإلى مصر وبين كل الدول قبل ما اسافر وطلعت فيزا تايلاند.

مكنتش مخطط للتفاصيل خلال الرحلة سواء ايه المدن اللي هزورها أو حجز الهوستيل أو لو حجز طيران من مدينة للتانية، مكانش فيه خط سير محدد داخل أي دولة. أنا كنت بنزل العاصمة أقضي فيها كام يوم ومن هناك أبدأ أعمل بحث بايه المدن اللي ممكن ازورها وأعمل جدول بسيط بيها وبعدد الأيام وبعد كدا انتقل للمدينة الثانية واللي بعدها وهكذا ولو فيه مدينة حبيتها كنت بقضي فيها وقت أكبر، الموضوع كان مرن جدا وكل حاجة كانت قابلة للتغيير. مثلا، أنا كنت بفكر في تايلاند أزور بوكيت وأقضي فيها وقت أسبوع مثلا، غيرت الخطة وزورت جزر وأماكن تانية ومزورتش بوكيت. كنت بحجز طيران داخلي قبلها بيوم و بحجز تذكرة من المحطة على طول و بحجز الهوستيل وأنا في الطريق

الفيزا

تايلاند: عملتها في مكتب سياحة جنب السفارة علشان معنديش HR Letter. قدمت للمكتب كشف حساب 3 شهور وحجز الفندق وحجز طيران من مصر للطيران غير مؤكدين. المكتب عمل HR Letter وأخذ مصاريف 1800 ج. لو من السفارة على طول والورق جاهز تتكلف حوالي ~ 800 ج - الفيزا إقامة لمدة شهر.

فيتنام: فيزا شهر عند الوصول Single Entry بـ 25 USD - قبلها عملت دعوة من شركة سياحة في فيتنام على النت بــ 6 USD من على موقع http://www.vietnamvisapro.com ودا أرخص موقع وجدته بيقدمها. قدمت على الموقع ودفعت ووصلتني الدعوة تاني يوم وخدتها معايا في المطار واستلمت بيها الفيزا.

هونج كونج: إقامة 90 يوم من غير فيزا ولا حتى ختم على الباسبور، بس ورقة بتدبس في الباسبور فيها الإسم ومدة الإقامة (Landing Slip).

لكن حصل معايا تحقيق في المطار لمدة حوالي ساعة. بمجرد ما الضابط شاف الباسبور المصري، طلع ورقة وبدأ يملأ فيها بيانات وبعد كدا نده زميله ليه وقعدت مكانه وطلعت أنا وهو على مكتب التحقيق. في المكتب اتسألت أسئلة كثيرة، ايه سبب الزيارة، هتعمل إيه في هونج، كام يوم، الدول اللي زرتها قبل كده سواء في الرحلة دي أو قبل كدا، مسافر بميزانية قد إيه، معاك كروت ائتمانية ولا لأ، طبيعة شغلك ايه بالتفصيل، طيب إزاي إنت مسافر 3 شهور، أخذت أجازة من شغلك إزاي؟ (أنا بشتغل أونلاين وعندي شغل خاص فدا بالنسبالهم كان مؤشر مش كويس). طلبت عقود لشغلي وكدا، لكن طبيعة شغلي مفيهاش عقود، قولتلها إن عندي موقع عليه شغلي، وريتها الموقع الخاص بيا والشغل اللي عليه ومعلومات عني موجودة فيه وتناقشنا شويه في طبيعة الشغل. وطلبت تشوف اللابتوب وإزاي بشتغل، طلعت الابتوب لكن كان فاصل شحن، طلبت تشوف صوري اللي تصورتها في الرحلة في الدول اللي زرتها، حجوزات الطيران بين الدول، ... أنا كنت متوقع التحقيق دا فكنت جاهز بكل حاجة ومكنش عندي مشكلة، كان معايا حجوزات الطيران بين الدول، كشف حساب، فيزا، كاش، ... طبيعة النقاش كانت هاديه، هما بس عاوزين يعرفوا أنا مين وجاي ليه، …

اندونيسيا: من غير فيزا، إقامة 30 يوم، ختم دخول وخروج على الباسبور.

ماليزيا: من غير فيزا، إقامة 90 يوم، ختم دخول وخروج على الباسبور.

جربت أروح سنغافورة من ماليزيا، لكن للأسف الفيزا اترفضت من غير أسباب. رحت السفارة المصرية في كوالا لمبور وطلبت خطاب عدم ممانعة لزيارة دولة سنغافورة واستلمته تاني يوم، بعد كده روحت مكتب سياحة (MP Travel & Tours) وقدمت الخطاب وصورة شخصية وحجز فندق وصورة الجواز و 150 رينجت (35 USD) وبعد كام يوم وصلني إيميل بالرفض. المكتب مش بياخد الباسبور، يطلب صورة بس، لأن الفيزا إلكترونية بتوصل على الإيميل.

وقت عمل الفيزا في المكتب مضيت على ورقه فيها ما يفيد إن مبلغ الفيزا لن يتم استرداده وأيضا عدم توضيح أسباب الرفض في حالة الرفض وقالت لي الموظفة إن الرفض شيء عادي ممكن يحصل. أرسلت للسفارة شكوى عن الرفض ومعلومات عن رحلتي ربما يراجعوا الطلب مرة ثانية، لكن من غير نتيجة وامتنعوا عن توضيح السبب.

كنت متخوف قبل السفر إن في مطار القاهرة حد يسألني عن تفاصيل الرحلة وخصوصا إني هروح اندونيسيا وماليزيا فكنت مقلق من موضوع التصريح الأمني وكدا على الرغم إن فيه وظيفه مكتوبة في الباسبور لكن مش في شركة. أول ما كنت بفكر في الرحلة كنت حابب أبدأ بماليزيا لكن فضلت أبدأ بتايلاند علشان ليها فيزا وبكدا يكون الموضوع أسهل لكن كنت مازلت متخوف بالنسبة للتصريح الأمني لو اتسألت عن خط سير الرحلة ويشوفوا فيها ماليزيا وإندونيسيا لكن محدش سألني خالص في مطار القاهرة رايح فين وجاي منين.

بالمناسبة، أنا باسبوري مكتوب فيه المهنة "مصمم جرافيك" والتجنيد "غير مطلوب" و فيزا تايلاند كانت أول فيزا على الباسبور.

الإقامة

دايما كنت بسكن في هوستلز (Dorm rooms)، التكلفة بمتوسط 5 USD في الليلة، أوقات كان فيه هوستيلز بـ 2 USD أو 3 USD. السعر دا في الليلة ميزة مهمة جدا للسفر لمدة طويلة. كنت بحجز من على HostelWorld أو Booking - كنت في البداية بستخدم HostelWorld بس، لكن بعد كدا بدأت أقارن بينه وبين Booking، أوقات Booking بيكون عليه حاجات أرخص وبعض الأوقات كنت بروح الهوستيل علطول من غير حجز وكنت بلاقي أماكن وبتكون بنفس السعر أو أقل. قبل كدا جربت الهوستيل في مصر أكثر من مرة وحبيت الموضوع وبالنسبالي الهوستيل جزء كبير ومهم جدا من تجربة السفر ومكان جميل جدا للتعارف على ناس من كل مكان، كلهم جايين بيسافروا بنفس الطريقة، وأغلبهم بيسافروا لمدد طويلة فسهل عمل صداقات والتشارك في أنشطة كتير مع بعض و كمان المشاركة في معلومات وخبرات عن السفر وإيه أفضل الأماكن والمدن الممكن زيارتها وعلى أساسه يمكن تغير خطة السفر زي ما حصل كتير معايا.

أقمت في 25 هوستيل، فيهم اللي بيقدم فطار وبيكون حاجة بسيطة، نودلز، عيش توست، مربى، زبدة، ... سناكس، موز، وشاي وقهوة مثلا، وفيهم من غير فطار. فيه هوستلز يكون فيها مطبخ عام ممكن اي حد يستخدمه، بالنسبالي كانت ميزة كويسة إني أشتري وأعمل أكل بنفسي. فيه هوستيلز نظيفة جدا جدا وفيه حاجات مشي حالك … الهوستيلز ممكن متكونش مناسبة لكل الناس، لكن السفر لمدة طويلة بالنسبالي مش هيتم إلا من خلالها علشان التكاليف والتعارف اللي بيحصل فيها وخصوصا لو مسافر وحدك.

في معظم الأوقات كنت بحجز ليلة واحدة في الهوستيل أو ليلتين على حسب معاد وصولي علشان أشوف لو مريح وعاجبني وكمان حبيت المدينة ولا لأ. لو الموضوع تمام، كنت بجدد يوم بيوم أو يومين على حسب، بدل ما أكون حجزت ودفعت 3 أو 4 أيام واكتشفت إن الهوستيل مش لطيف أو المدينة مش مستاهله أكثر من يوم.

أكثر ناس قابلتهم في الهوستيل هما الألمان، كتير منهم سنهم بيكون ~ 18 - 20، بيخلصوا ال High School ويسافروا لمدة 6 شهور أو سنه وبعدها بيرجعوا يكملوا دراسة تاني. أنا ما قابلتش ولا مصري طوال الرحلة في أي هوستيل، قابلت واحد لبناني واثنين من الجزائر وواحد من المغرب. قابلت بس مجموعة مصريين كانوا في رحلة بالصدفة في الشارع في مدينة سابا / فيتنام وكنت سعيد بالتعرف عليهم.

الطيران والمواصلات

الذهاب: القاهرة > بانكوك

العودة: كوالا لمبور > القاهرة

حجزت قبل السفر بــ 18 يوم على الإماراتية من خلال الموقع الخاص بالشركة والتكلفة كانت 9700 ج ذهاب وعودة. كنت حاجز الرحلة 3 شهور، خلال الرحلة جددت 10 أيام، دخلت على الموقع وغيرت يوم العودة، التغيير كلفني حوالي 480 ج.

رحلات الطيران في آسيا استخدمت AirAsia و رحلة واحدة مع HK Express لهونج كونج من فيتنام. في أول رحلتين طيران مع AirAsia كنت مقلق من الوزن المسموح بيه على الطائرة وهو 7KG وكان بيكون معايا كام كيلو زيادة فكنت بلبس معظم الهدوم علشان أقلل الوزن قبل ما أعمل الــ Check-in لكن أول مرة محدش سألني إني أوزن الشنطة وتاني مرة عملت Self Check-In من خلال الماكينة (Check-in kiosks) ومن خلالها بستلم الـ Boarding pass، فبعد كده كنت بعدي عادي لو معايا وزن زيادة من غير ما أكون قلقان.

وأنا مسافر من القاهرة على الإماراتية، الشنطة اتوزنت وكانت 7KG. وأنا جاي من كوالالمبور لمصر على الإماراتية، الشنطة اتوزنت وكانت حوالي 15KG لكن الموظف مدققش وعديت عادي. الشاهد، إن محدش في AirAsia سألني أوزن الشنطة في الأوقات اللي كنت بعمل Check-in مع الموظف وباقي الأوقات كنت بعمل Self Check-In. أعتقد طالما أبعاد الشنطة تسمح تدخل بيها الطيارة، فعادي. ممكن حد تاني حصل ووزنه الشنطه ودفع فلوس زيادة، لكن دي تجربتي واللي حصل معايا. تجربتي مع AirAsia مفيهاش اي مشاكل بخلاف تأجيل رحلة لمدة ساعة وتم تنبيهنا على الإيميل. طيران رخيص وخدمة كويسة بيأدي الغرض.

سافرت بشنطة Backpack 30L وكانت مناسبة جدا ليا وكانت معايا دايما على الطائرة ودي أهم حاجة كنت محتاجها.

فيه أكثر من موقع لحجز المواصلات، زي مثلا:

https://12go.asia/en

https://www.baolau.com/

ودول كنت بحجز عليهم الباصات أو العبارات أو القطار. لو مسافر مسافة كبيرة داخل الدولة من مدينة لمدينة وحابب أحجز طيران، كنت بحجز مباشرة من موقع AirAsia.

بعد فترة من سفري، معظم الأوقات كنت بروح المحطة واحجز مباشرة من هناك، بيكون اوفر علشان الموقع بياخد مصاريف زيادة.

في هونج كونج، قبل ما أوصل اشتريت كارت Octopus أونلاين (klook.com) بــ USD 11.75 واستلمته من المطار و كان فيه رصيد (HK$50) واستخدمته مباشرة لركوب الباص من المطار للمدينة. ممكن استخدام الكارت في المواصلات، ... ويتم الشحن من خلال السوبرماركت، زي 7-Eleven

عملت Hitchhiking حوالي 4 مرات في ماليزيا وكانت مع التجارب الممتعة جدا جدا والناس كانت دايما بتحب تساعد وتقف على طول. دقائق قليلة وكنت بلاقي نفسي راكب عربية مع حد، سواء ملاكي أو عربية نص نقل بتنقل خضار، … وكانت فرصة أتكلم مع حد من أهل البلد وأعرف هو بيشتغل إيه وعايش فين وكدا… طبعا مدة الإنتظار ممكن تتطول وبتفرق من مكان وطريق للتاني، بس بالنسبالي كان الموضوع سهل. كل الناس اللي ركبت معاها كانت بتتكلم انجليزي ولو حتى بشكل بسيط بحيث نكون فاهمين بعض. أنا كنت بكتب اسم المدينة اللي عاوز اوصلها على ورقة بشكل واضح وأقف على الطريق ورافع الورقة بحيث اللي جاي يشوف اسم المدينة. مش لازم إن اللي بتركب معاه يكون رايح لأخر نقطة إنت عاوز توصلها، ممكن تنزل في نص المسافة مثلا على حسب طريقه وبعد كده تكمل مرة تانية، فالمشوار خصوصا لو طويل ممكن يتم على مراحل. في البداية كنت حاسس إن الموضوع غريب وحاسس بالحرج وكدا، لكن بعد مرة والتانية الموضوع كان طبيعي وممتع جدا.

أوقات لما كنت بكون ماشي على الطريق في أماكن بعيدة عن المدينة أو المناطق السكنية في جزيرة مثلا، أو لما يكون فيه مطر، بلاقي حد بيقف من غير ما أشاور و بيعرض عليا إنه يوصلني.

مشهور جدا تأجير الموتوسيكلات في جنوب شرق آسيا، متواجدة في كل مكان وكمان التأجير رخيص. شوفت حوادث كتير جدا وخصوصا في جزر تايلاند، الطرق هناك فيها مطالع ومنازل وملفات حادة والإصابات بتكون صعبة جدا بتوصل لكسور في العظام. الشاهد في الموضوع، لو الواحد مش بيعرف يسوق كويس، فبلاش أو تسوق بحذر وأكيد تأمين السفر الطبي هيكون مهم جدا هنا.

نقطة كمان، ممكن تأجر موتوسيكل من غير رخصة، لكن في اكتر من حد قابلته كان سايق من غير رخصة واضطر يدفع غرامة كبيرة. الموتوسيكل بالتأكيد هيدي فرصة أكبر لاكتشاف المكان والسفر من مدينة لأخرى ودي كانت من الحاجات اللي كنت عاوز أعملها بس بالنسبالي مكنتش بعرف أسوق ومفيش رخصة بالتأكيد وكمان كنت مسافر من غير تأمين طبي - على سبيل التجربة، في بالي خليت حد يعلمني حوالي ساعة والموضوع كان ممتع.

بدائل أوبر هناك Grab، و زيادة عليه Go-Jek في إندونيسيا

المدة في كل دولة، المدن وعدد الليالي في كل مدينة واسم الهوستيل

تايلاند: 21 يوم، 7 أماكن:

Bangkok: 3 nights / r-one 24/7

Pattaya: 3 nights / Shady's Hostel

Koh Tao: 2 nights / 8 homestel

Koh Phangan: 3 nights / Treechart Hostel

Krabi Town: 2 nights / Cube Hostel Krabi

Koh Lanta: 4 nights / Easylife Bungalow

Chiang Mai: 3 nights / (1 night at: Bunchun & 2 nights at: The Living Place 3)

فيتنام: 21 يوم، 8 أماكن:

Hanoi: 3 nights / Daisy Hostel

Sapa: 3 nights / Sapa Odyssey Hostel

Cat Ba and Halong Bay: 2 nights / Bay View Hotel

Ninh Binh: 2 nights / Tam Coc Bamboo Homestay

Hue: 1 night / Ngoc Hung Backpackers

Hoi An: 2 nights / Cloudy Homestay and Hostel

Nha Trang: 2 nights / Bondi Backpackers Nha Trang

Da Nang: 1 night / Fedora Hostel

هونج كونج:

3 nights / Apple Inn Tsim Sha Tsui

إندونيسيا: 20 يوم، 3 أماكن:

Jakarta: 2 nights / Six Degrees

Bali (Kota): 3 nights / Bedbunkers

Bali (Ubud): 14 nights / Coconut Ubud Hostel

Bali (Kota): 1 night / Bedbunkers

ماليزيا: 30 يوم، 7 أماكن:

Kuala Lumpur: 6 nights / Step-Inn Too Guesthouse

George Town: 7 nights / 28 Bahari

Langkawi: 2 nights / Vila Thai

Melaka: 3 nights / D Brug Guesthouse

Cameron Highlands: 3 nights / CH Merlin Inn

Kota Kinabalu (Sabah): 2 nights / The Jesselton Cabine

Kundasang: 4 nights / (2 nights at: Happy Garden Resort & 2 nights at: Postar's Backpacker)

Kuala Lumpur: 3 nights / Step-Inn Too Guesthouse

المصاريف في كل دولة (غير شاملة رحلات الطيران بين الدول أو داخل الدولة)

تايلاند: 550 USD

فيتنام: 450 USD

هونج كونج: ~ 120 USD

إندونيسيا: 430 USD

ماليزيا: 700 USD

مصاريف الطيران

Cairo > Bangkok & Kuala Lumpur > Cairo: 9700 EGP + 480 EGP (Extension) =~ 580 USD (Main Flights)

Bangkok > Hanoi: 60 USD

Da Nang > Hong Kong: 69 USD

Hong Kong > Jakarta: 111 USD

Jakarta > Kuala Lumpur: 38 USD

Krabi > Chiang Mai: 55 USD

Jakarta > Bali: 51 USD

Bali > Jakarta: 64 USD

Kuala Lumpur > Kota Kinabalu: 34 USD

Kota Kinabalu > Kuala Lumpur: 34 USD

Total Flights Cost == 1096 USD

ميزانية الرحلة كلها حوالي 3350 USD شاملة كل رحلات الطيران والسكن والمواصلات الداخلية سواء طيران او باص، ... والأكل والشرب، كل حاجة. طبعا المصاريف دي نسبية جدا وبتفرق من شخص لشخص في حاجات وتفاصيل كتير لكن حبيت أوضحها علشان تدي تصور. أنا كان معايا دولار كاش وبحول من مكاتب الصرافة في البلد. في المطار بحول حوالي 50 USD بس عشان السعر بيكون قليل، وبعد كدا بحول من اي مكتب صرافة في المدينة وموجودين في كل مكان بخلاف الأماكن البعيدة والريفية. استخدمت الـ ATM أكثر من مرة لأني بكون في أخر يوم ليا في البلد ومش حابب اغير دولار، لكن العمولة بتكون كبيرة، مش فاكر الحقيقة كام بالظبط. لو هتعتمد على الـ ATM بشكل أساسي، ممكن تسحب مبلغ كبير يكفي لفترة كبيرة عشان ما تدفع عمولة في كل مرة تسحب فيها ويفضل يكون معاك مبلغ دولار كاش للظروف، ... زي مثلا فيزا فيتنام بتدفع دولار كاش في المطار.

Maps.me

Google Trips

Google Maps

Polarsteps

Currency

Grab

Go-Jek

99 يوم مش كفاية لجنوب شرق آسيا، و3 أسابيع مكنوش كفاية بالنسبالي سواء في تايلاند وفيتنام وإندونيسيا، على الأقل شهر في كل دولة أو أكثر، لأن الدول كبيرة والمدن كتيرة ومحتاجة وقت كبير، وكمان فيه دول تانية مزورتهاش، لكن التجربة كانت لا تنسى :)